من مناقشات قعده الحريم على الكوم من 50 سنه
ضل راجل ولا ضل حيطه!
وقفت الست بهيه على كوم عالى فى الجرن, وبدأت تخطب وسط الحريم المرصوصين على المصاطب:
قال بيقولوا ضل راجل ولا ضل حيطه... ياختى بلا وكسه!
@بذمتك عمرك سمعتى عن حيطه تقعد تشخر طول الليل وماتخليكيش تعرفى تنامى
@ولا حيطه تدخل من باب البيت تجعر عايزة الغداء. وبعدين تطين عيشتك علشان الملح طلع زياده فى الباميه!
@ولا ممكن ترجعى البيت فى يوم تلاقى الحيطه بتبوس الشغاله؟
@طيب شفتى حيطه تملا لك سقف البيت دخان , وارضيته سبارس!
@ولا حيطه تقعد تتنك عليكى وتقول لك انتى رايحه فين وجايه منين!
@ولا حيطه تصحيكى فى نص الليل علشان معرفش ايه طلع فى دماغها!
@ولا حيطه تدوخك وراها علشان تشوفى هيه بتكلم مين فى التليفون بعد نص الليل!
@طيب دى الحيطه معروف مكانها دايما, انما المحروس يدوخك وراه علشان تعرفى هو سهران فى انهى داهيه.. قال ايه عنده شغل! يا سم!
@بذمتك فيه حيطه تحاول تطلعك غلطانه فى كل كلمه تقوليها علشان تثبت للعيال ان الحيطه بتفهم أحسن منك.
@ولا حيطه تلوى بوزها وتقشر بياضها وتقعد بالفانله لما أمك تيجى تزورك, وتحبك معاها تحكى نكت عن الحموات!
@ولا حيطه تقعد تقولك ما تخرجيش بالفستان ده أحسن محزق عليكى , ولما تقولى لها هاتى فلوس علشان تشترى فستان غيره , تعمل ودن من طين وودن من عجين طيب دى حتى الحيطان ليها ودان!
@يا شيخه بلا قرف, الحيطه أجدع , على الأقل مش هتتحبسى لو فاض بيكى ونفذتى حلم كل الستات.. ودقيتى فى الحيطه مسمار!